Die vebroche Schissl odr de Gatcherbendl

Von Dorothea Renner

Em Hansjer is a großes Unglick wiedrfahre. Sei Fraa is gstorwe un hotn mit drei klune Kinnr
zurickgelosse: dr Franz mit kaum 6 Johr, no isses Bärwlche kumme und no de Hansjerche mit 3 Johr.
Er war awr arich gschickt und hot Haus und Hof vrsorcht, er hot gewäsche, gemangt, sauwr gemacht und gekocht, ja sogar Latwerjebogatsche gebacke, weil sei Kinnr die so arich gern gesse hun.
Umol, ama schiene Sommermorjet hun die drei Kinnr sich im Hof as Kaut gemacht un hun Knepp gschuckt. Ihre Katz hot dabei geleea un hot sich gsunnt.  Die Kichatiir is uffganga, dr Hansjer kummt raus, es straafich Hemad un die weißa henfena Gatcher uu, die Taigschissl im Oarm. Er setzt sich uff da Gangstorz un nummt die Schissl zwischa die Knie. Er schaut niwer zu dena drei und frot: „Wer gewinnt dann?“ „ De Franz, wie immr, “ saat s Bärwlche, „ ich bin’s laadich, ich spiel nimmi mit“, dann geht s zu de Katz un fangt o se zu schmaichle.

Die Katz schnurrt, setzt sich hie und reibt sich am Bärwlche. De Hansjer nummt de Kochlöffl. De Taig muss fescht gschlaa wera. Wie er so fleißig geriehrt hot, is alles ins Wackla kumma: da Gatcherbendl hot vorna rumgebambelt, hinnadru die Gatchr un all des empfindlich Sach wo eiwendich in de Gatchr drin war. Alles hot gewackelt! Des hot die Katz gseh. Sie hert uff mit em Bärwlche zu schmuse, ihre Aage geha mit em Gatcherbendl hii un her, sie duckt sich nunnr un de Schwanz  reibt uff de Erd, dass es staabt. Des seht de Franz un kreischt:“ Vaddr, Ihr brecht die Schissl!“ „A, wu wer ich dann, “ saat de Hansjer, „ ich hun doch schun efter Taig gemacht!“

Awr de Franz hot sei Katz gekennt un hot nochamol nausgeplärtt: „Vaddr ich saas eich, Ihr brecht di Schissl!“ Es wor zu spät. Die Katz hot a Satz gemacht, an ihra Vordrpfota die Kralle nausgfahre um da Gatcherbendl zu verwischa un hot mit aller Kraft hinadruu gedroffa.! De Hansjer hot a Lewesschrai ausglosse, die Knie zammagschlaa, die Schissl is fortgfloh un in hunert Stiklcher verbrocha.. De Hansjer is uffgsprunga, ganz vedattert hot er in unre Hand de Kochleffl ghale un mit de anre Hand une zughalle!

De Franz, der Lauser, hot die Händ in die Seit gestemmt un hot schadafroh gemuunt: „ Gell Vaddr, ich huns eich getermt, Ihr brecht die Schissl“